加载中…
昆陽縣附城地方，有一人姓曾，名恭禹，家資數千。結髮之妻顏氏，生一子，名叫亞成。養至七八歲，值明朝天啟之時，地方盜起，不幸遭亂，妻子被賊捉去。亂定之後，續娶一個填房孔氏，又娶妾楊氏，妻生三子。妾又生三子。論起層次，長子亞孝派第一，亞忠派第三，亞信派第四，此三個仔，俱係正妻所生。亞悌派第二，亞仁派第五，亞義派第六，此三個仔，俱係妾氏所生。六個仔，名為孝悌忠信仁義，六個字俱是好字眼，似乎一家都是好人矣。六個仔之中，惟亞悌係秀才，果然好人品，依道理而行。其餘五子，俱是惹是招非，而性情暴戾者也。
世有改其子之名叫做亞善，未有叫做亞惡者。有叫做亞良，未有叫做亞匪者。猶之乎改個堂名，有的叫做積善堂，有的叫做種福堂，諸如此類，不可勝計也。既稱積善，自問一年積得幾多呢？既稱種福，自問一世種得幾多呢？若非積善而自認積善，並無種福而自認種福，則是欺人騙人，而並欲以自欺自騙也。
有時對人曰：「我一世唔好講大話。」如此重，唔係講大話麼？或有寫積善堂，其實好積惡，寫積福堂，其實好種禍，即繫掛家用招牌而專好賣假貨也。
其後，曾恭禹因病而死，眾子相聚守喪。將入棺時，死者眼中淚如湧出，眾人看見個個皆驚，以為奇怪。亞涕秀才曰：「父入棺而出淚，必有不祥。父親知我兄弟平日好鬥，將來必有禍患，故雖死不安而流淚，告我眾兄弟務宜一團和氣，忍事為佳，免父在九泉猶難閉目。」各兄弟笑曰：「你勿講得咁廢，唔關個的事，總係喃魔先生擇時辰，唔得乾淨耳。」殯葬既畢，兄弟分產異居。亞孝自高自傲，以亞悌、亞仁、亞義係庶母所生，不以骨肉相待，作佢為低一格而卑賤之。結理亞忠、亞信，作為一黨，話：「我三兄弟係大婆仔，佢三個係妾氏仔，就欺佢打佢，都唔奈得我乜何？」亞忠、亞信亦以為然，好似狐假虎威，狼跟豺尾。有時客來探，到開筵飲酒，亞仁、亞義經過堂下，不叫一言。仁、義忿告亞悌曰：「豈有此理！咁無情份，唔通兄弟不如外人，朋友尚且交杯，而細佬行過，竟然不恤。
佢不以我為弟，我亦不以佢為兄，不如我三兄弟，亦聯理結為一黨，共佢相抗。況且我二哥係做秀才，斷唔輸得過佢。」亞悌勸曰：「細佬，唔係咁講，佢做亞哥唔明，我忍讓下佢，世界事情有乜緊要呢？路上相逢，尚且讓人三步，何況自己兄弟，講乜冤仇呀！細佬之言，我不從你。」亞仁、亞義年紀尚輕，因亞悌之言其意亦止。
又說亞孝，有個女嫁縣城外姓周。亞孝誣賴親家，話唔醫理佢女，以至於死。喝起兄弟子姪及潑婦等，去捉親家婆，要打過以消此恨。又話亞悌曰：「你做個秀才，份外有的膽色，你都要去，唔好延遲。」亞悌諫曰：「佢做家婆，豈有唔愛新婦之理？請醫下效，難以挽回。今糾率多人捉他凌辱，你做得出，難對鄉鄰，叫我同行，我斷不去。」亞孝曰：「細佬，你勿去咯，我估你做秀才，幫得下手，誰知唔做得料駛，在你三分責，一片講執滯，我話你係廢。」
亞悌个的廢法，正是超羣脫俗，高出庸眾之流。
豈同砧板蟻、溝渠鴨、臘豬頭、烏龍尾，遇人有的小事，便想插身入內，挑三撥四，作浪生風，講週身本領，兜錢入荷包麼？
由是不聽亞悌之言，叫齊忠、信、仁、義與子姪等，及族中無賴之徒，去捉周氏親家婆，拳打腳踢。有的去打爛水缸，有的去打穿米塔，有的去打崩飯鑊，有的拈斧頭砍破大門，有的執竹篙攏掃屋瓦，打得穿崩破爛，好處無存。眾等歸來，盡情投告，亞孝拍掌跳起曰：「好呀！好呀！將佢家私什物散清，都係爽呀！」
將彼家私盡挫磨，不知爽法又如何？ 貪涼愛食生蘿蔔，只怕他時肚痛多。
亞悌聞之，緊皺雙眉，搖頭歎曰：「你係爽咯，難為人苦得淒涼呀！」
鄉村間，或遇婦女投河弔頸，服毒身亡，其外家係好風俗、識情理者，可安然無事。若遇恃蠻恃惡之村，一闖此事，便多糾率多人，叫齊個的強橫後生、撒潑婦人，疏者認為至親，遠者認為至近，有男有女，有老有少，如黃蜂出洞、猛虎下山，擦掌磨拳，呼天震地，大聲叫曰：「各人整定身勢，今日去擺人命呀！」有肉食，有錢使，不論三七甘一，真假虛實，總之，要蠻可以做得。其中又有一兩個攪屎棍、風爐扇，曉作幾句狀詞，識得幾個差役，自認有膽有識，村中稱佢做師爺，遂做主謀，從中撥弄，而一隊烏鴉黃雀飛去尋食矣。去到死者之家，如雀鳥歸巢、鵝鴨到埠，墟咁嘈蝦咁跳，話逼死佢個女、逼死佢個妹、逼死炬亞姨，詐哭得嗚嗚含悲，似切切擠擠擁擁，風起塵飛，要捉死者之家婆抱屍，要捉死者之丈夫毆打，有的想牽牛，有的去捉豬，連雞仔雞母都煮熟食，又嫌豉油咸，又嫌燒酒淡，又嫌豬肉肥。食完之後，各派封包，有的嫌輕，有的嫌少，認到至親至切，好多眼淚都無。